خرافات في علم النفس - الجــــزء الأول
في كتاب " أشهر 50 خرافه في علم النفس"
ودا واحد من أفضل الكتب اللي بتتكلم عن فن تصدير الخرافات وترويجها وكتبه اربعه من كبار الاساتذه : سكوت ليلنفيلد " استاذ علم النفس بجامعه ايموري باتلانتا" - ستيفن جاي لين : مدير العياده النفسيه بجامعه نيويورك - جون روشيو : استاذ بكليه نيوجيرسي - باري بايرستاين: استاذ بجامعه سايمون ورئيس جمعيه بريتش بكولومبيا
السؤال الاهم: ليه الناس بتصدق في الخرافه؟ ...انا اقولك: كان فيه اعلان لشركه طيران وقالت فيه ان الانسان بيستخدم 10 % بس من قدره مخه لكن لو انت عميل لشركتنا فاكيد انت بتستخدم اكتر من كدا بكتير..بس ياريس...انت كدا لبست السلطانيه...
1-الخرافه اتصدرتلك عشان تمنجهك وتخاطب الشخص المغرور جواك وتحسسك انك مميز وبتفكر اكتر م الاخرين دا غير ان فيه حقايق كتير في جوهرها اشبه بالخيال فالانسان بيحط عليها التحابيش عشان تثير عقله وخياله ...زي مابيقول السير كارل بوبر " لابد ان يبدأ العلم بالخرافات وبنقد الخرافات" -
2- سبب تاني من انتشار الخرافه وتصديقها هي تناقل الاحاديث وخصوصا في علم النفس الشعبي القايم علي المحاضرات والندوات والتواصل اللفظي اكتر
3- الرغبه في الاجوبه السهله والسريعه مثلا حد يقولك احضر دوره وهتخليك شاطر وتفهم بسرعه كل اللي بتقراه ...او حد تاني يقولك الدورة بتاعتنا اثبتت نجاحها في زياده معدلات ذكاء واستيعاب الحاضرين بنسبه 75 % وفهم 3000 كلمه في الدقيقه الواحده ..الارقام والاحصائيات بتدي حل سريع ومريح للبشر رغم ان محدش غالبا بيسأل عن المصادر
4- الإدراك الانتقائي وهي ربط الاحداث ببعض ونطلعلنا بنظريه مهلبيه زي زياده دخول المصابين للمستشفي في وقت اكتمال القمر حاجتين ملهمش اي علاقه ببعض ولكن بعض الدكاتره مقتنعه ان فيه ارتباط بينهم ودا بيؤدي لإستنتاج علاقه سببيه من الارتباط وطبعا الكلام دا بلح زي ان الاعتداء ع الاطفال هيحولهم الي معتدين لما يكبروا ودا كان اختيار عشوائي للاطفال فمش بالضرورة ابدا ان طفل تم الاعتداء عليه واصبح معتدي لما كبر يبقي بسبب اللي حصله أو بمعني ادق مش سبب كافي او جازم
5- التعرض لعينه منحازة ...مثلا ارتياح البعض لما يشربوا مشروبات اعشاب فمش بالضرورة ان المشروبات دي تكون هي السبب في الهدوء او الراحه او انها بتشفي من الامراض ودا اللي برامج التلفزيون بتقوله وبيأثر علي مجموعه كبيره من المشاهدين
6- تطبيق مبدأ في علم النفس اسمه" المنهج الاستكشافي القائم علي التماثل" واللي صاغه تفريسكي وكاهنمان سنه 1974 ..يعني ايه؟...يعني لو انت ماشي في امان الله ولقيت واحد ملثم خارج من بنك وماسك مسدس اول حاجه هتعملها انك هتجري من قدامه , غالبا مش هييجي في تفكيرك انهم بيمثلوا فيلم اكشن ...ليه؟..لانك شفت المشهد دا في فيلم قبل كدا وعارف ان دا الشكل بتاع حراميه البنوك
7- الطرح المضلل في وسائل الاعلام...يعني تطلع مذيعه وتتكلم عن الطاقه وتقول انها قدرت تحول اعصار في بلد ما او ان كل المتوحدين عندهم قدرات عقليه فذه وبيعرفوا يجمعوا تويني بلص تن 
...
...
8- التهويل في شرح الحقايق...زي ماقلنا في الاول ان فيه حقايق اغرب من الخيال لكن اضافه خيال زياده هيحولها لخرافه وزي ما بيقول عم الكل كارل ساجان: إذا بدا ان شيئا ما أروع من أن يكون حقيقيا فهو علي ألارجح كذلك
9- الخلط بين المصطلحات : يعني الشخص الفصامي معندوش كذا شخصيه عايش بيها ...اصلا معني كلمه فصام واللي عرفها الطبيب السويسري يوجين بلوبر سنه 1911
معناها عقلا منقسما يعني انقسام في الوظايف النفسيه زي التفكير والمشاعر
#الخرافه_الاولي
"احنا بنستخدم 10 % من المخ" ....(ابراهيم الفقي ستايل)
وزن المخ حوالي 2-3% من زون الجسم وبيستهلك اكتر من 20% م الاكسجين اللي بتتنفسه.
سنه 2005 واحده من فلوريدا ماتت لانها كانت بتعاني من حاله فقدان وعي مستمر ودا خلاها تفقد 50% من النسيخ المكون لمقدمه المخ المسئول عن الادراك والمشاعر ولكن كان عندها نوع من الوعي رغم انها فقدت جزء كبير من وظايف المخ الحيويه
حتي جراحين الاعصاب لما عملوا تحفيز للمناطق الخامله بالمخ مكنتش خاليه م الادراك او الوعي معني الكلام دا ان المخ كله شغال وبيستهلك قدراته بشكل كامل مش جزء معين حتي عند المصابين والمرضي
لكن السؤال اللي بيطرح نفسه ليه الخلط دا حصل؟
الناس اساؤوا فهم القشره الخامله او قشره الربط في المخ ان مالهاش دور رغم ان ليها دور حيوي في وظايف المخ زي اللغه والتفكير والحركه
واحد من رواد علم النفس الامريكي وليام جيمس في أوائلل القرن العشرين قال في إحدي محاضراته إن الأفراد العاديين بيستخدموا 10% من قدراتهم الذهنيه
ومن هنا تحولت كلمه قدرتهم الذهنيه الي امخاخهم
واحد من اكتر الكتب في المبيعات وهو كيف تكسب الناس وتؤثر في الاصدقاء لديل كارنيجي قال إن الناس بتستخدم 10% من أمخاخهم ومن هنا انتشرت الشائعه أو سوء الفهم أو الخرافه دي بشكل كبير حتي في الأوساط العلميه لدرجه استفتاء اتعمل علي خريجي جامعات البرازيل وكانت النتيجه حوالي 59 % من الطلبه مصدقين المعلومه دي
تلت الطلاب الجامعين اللي بيدرسوا علم نفس مقتنعين بيها
6% من المتخصصين في علم الاعصاب مؤيدين هذا الاعتقاد
بس فيه جزء كويس وهو ان النسبه دي حفزت الناس انها تجتهد اكتر.. تخيل مدير شركه وبيستخدم بس 10% من قدراته الذهنيه اومال لو استخدم الباقي هيبقي ايه...رئيس مصر مثلا ..
#الخرافه_التانيه
"انت مخك شمال"
ناس كتير ممكن تقول إن فلان بيفكر بنص مخه الشمال او نص مخه اليمين ...وربنا يجعلنا من اهل اليمين...
...الكلام دا بلح ..صحيح ان المخ مقسوم نصين نص يمين ونص شمال وبينهم ماده او مجموعه من الحزم العصبيه اسمها كوربس كولوسوم وساعات بيشيلها الجراحين لانها بتعالج حالات الصرع بشكل كبير وفي الحاله دي بس ممكن المريض يفكر بنص مخ واحد لان حلقه الربط او التواصل والتشاور بين المخين اتشالسنه 1981 روجر سبيري كان بيعمل تجارب ع المرضي اللي عملهم عمليه شق المخ
روجر لقي الدنيا خربانه خالص...المريض يجمع حاجه بايديه اليمين ومن غير ما يحس يلاقي ايده الشمال بتفكها
تفرجه صورة واحد عريان تلاقيه بيضحك تسأله بيضحك ليه ميعرفش يرد
طيب..بالنسبه للبشر العادين الامر مختلف النص اليمين م المخ مسئول عن الجزء الشمال م الجسم والجزء الشمال م المخ مسئول عن وظايف الجزء اليمين م الجسم
الجزء اليمين مسئول عن تحديد الاماكن والجزء الشمال م المخ مسئول عن الكلمات والتفاصيل الدقيقه لكن اي قرار او فعل بياخده الانسان نص المخ اليمين بياخد ويدي مع نصه الشمال
خرافه اليمين والشمال دي جت مع ورش العمل الابداعي واختبارات الذكاء عشان تحدد مستوي تفكيرك وانت عاطفي ولا عقلاني...الناس اللي بتتعامل بعنصريه مع المخ ..يعني لو انت بتفكر بنص مخك الشمال تبقي عقلاني وتحليلي ومش عاطفي وذكوري وابن كلب ولو بتفكر باليمين تبقي عاطفي وشمولي وانثوي وابداعي وكيوته
صحيح التدريبات دي بتحفز الجزء المسئول عنها من المخ لكن سياده القرار بترجع للمخ كله علي بعضه.
#الخرافه_التالته
"بيفكر بالصيني...بيفكر بالصيني" ( من فيلم الحاسه السادسه)
الفيلم العربي التافه (الحاسه السادسه) بطوله احمد الفيشاوي بيحكي انه اتعامل مع وسيط روحاني واداله موهبه وهو انه يقرا افكار الناس هي دي" الحاسه السادسه"..بس دا مش مجرد فيلم ..الهري دا بنشوفه كل يوم ..افتح اي قناه تجاريه وهتلاقي اعلان عن الشيخ المغربي الروحاني لجلب الحبيب وفك العمل وتطويع الزوج وقراءة الطالع ووشوشه الودع وتصليح المجاري
او الشيخ علي القناه اللي كان بيتواصل مع الجن ع الهوا وذله وكسر نفسه وخلاه ينطق الشهاده
والكاهن اللي بيعمل الصح مع الشياطين وتحط زجاجه مياه قصاد الشاشه والف مبروك بقي معاك المياه المبروكه لتضخيم العضلات وتكبير الثدي وعلاج سرعه القذف والإمساك
ايه بقي حوار الحاسه السادسه دا؟
سنه 1870 ريتشارد بيرتون قال ان الادراك او المعرفه من غير استخدام الحواس الخمسه المعروفه وسماها الحاسه السادسه
نتيجه استفتاء من بين مجموعه كبيره نسبه كبيره مقتنعين بوجود الحاسه السادسه والتخاطر والجلاء البصري او الاستبصار يعني القدره علي معرفه الماضي والتنبؤ بالمستقبل , الكلام دا في امريكا اكتر بلد علمي مش في مصر
حوالي 26% مقتنعين بالجلاء البصري و31% مقتنعين بالتخاطر بين العقول و41% من 1002 امريكي مقتنعين بوجود الحاسه السادسه
سنه 1972 الحكومه الامريكيه دفعت 20 مليون دولار علي برنامج ستارجيت كان بيجيب الرائيين او اللي عندهم قدره علي الاستبصار عشان يدلوهم علي معلومات عسكريه احداثيات جغرافيه مهمه او مكان لمفاعل نووي بعدها ب3 سنين الحكومه وقفت البرنامج لان ماجابش معلومه واحده مفيده
طبعا الاعلام والافلام والبرامج التلفزيونيه ساهموا بشكل كبير في نشر الموضوع دا بخلاف راي عدد كبير من الناس اللي زعموا ان الامر دا حصل معاهم شخصيا وهما مش بيكدبوا بس الموضوع محض صدفه مالوش اي اساس علمي او قدرات خارقه
زي انك تفكر في حد فيتصل بيك صدفه مش اكتر لكن احنا بنتعامل مع الموضوع بمبدأ الادراك الانتقائي وهي اننا بنفتكر اي حدث بيؤيد المعتقدات بتاعتنا
لكن التفسير الحالي وعلم الاحتمالات بيقول ان لو فيه 25 شخص فاحتمال ان اتنين اتولدوا ف نفس اليوم 50% ولو عددهم 35 نسبه الاحتمال هتزيد ل87%...متخيل النسبه؟!
بخلاف ان برامج كتير استخدمت النصب والتشويش علي الحاضرين عشان توصل للنتايج اللي عاوزاها وخاصه البرامج الكاريزماتيه او الدينيه اللي بتزعم شفاء المرضي
#الخرافه_الرابعه
Mozart Effect
تأثير موتسارت : المصطلح دا صاغه الدكتور الفريد توماتيس ونشره الموسيقي دون كامبل ويشير للتحسن في مستوي الذكاء بعد سماع الموسيقي الكلاسيكيه
مفيش دراسات اثبتت وجود علاقه بين مستوي ذكاء الشخص وسماعه للموسيقي ولا حتي عند الاطفال الرضع لكن الموضوع دا منتشرجدا لدرجه ان حاكم ولايه جورجيا سنه 1998 خصص ميزانيه 105 الف دولار لاسطوانات موتسارت وبيتهوفين لكل مولود ..الدراسات لقت علاقه بين الموهبه الموسيقيه ومستوي الذكاء لكن مجرد سماع الموسيقي بيحسن المود عند البالغين لكن مالوش تأثير في ذكاء الاطفال الصغار , طبعا سماع الموسيقي شيء مهم ومفيد وتعلم الموسيقي شيء افيد لكن مجرد السماع مش بيزود مستوي الذكاء
فيجوتسكي باحث روسي في علم النفس بيقول ان افضل تعلم للطفل بيكون في مرحله النمو التقريبي يعني تعلم الطفل لشيء لازم يكون في وقته وظروفه المناسبه فصعب انك تعلم الطفل الحسابات وهو عنده 3 سنين مثلا لازم يكون عمره العقلي مستعد لدا
#الخرافه_الخماسه
"أزمه منتصف العمر"
في فيلم الجمال الامريكي American beauty للبطل كيفن سباسي ترك وظيفته واشتغل طباخ في محل همبورجر وبدا في تناول العقاقير وممارسه الرياضه ووقع في غرام صاحبه بنته
فيه فيلم مصري قديم مش عاوز افتكر اسمه بطوله يحي الفخراني موظف قروي بائس يعول اسره كامله حتي تاخر سن الزواج بيه ووقع في غرام فتاه لعوب تقريبا مديحه كامل رغم سماجه الموقف والعلاقه الغراميه السيكاديليك بين فتي الكرش وحته الكراميل الا ان الفيلم بيجسد ازمه منتصف العمر والمراهقه المتأخره.
مصطلح ازمه منتصف العمر قاله اليوت جاك سنه 1965 لما وصف الفنانين والملحنين اللي خايفين م الموت وعاوزين يفضلوا عايشين في فتره مجدهم وشبابهم
لكن مفيش أي دراسات علميه أكدت علي ضرورة ازمه منتصف العمر ..دراسه اتعملت علي 1501 من الازواج في الصين اعمارهم من 30-60 سنه وعلي 7195 رجل وست اعمارهم من 25-74 سنه كانت النتيجه انهم مالكين زمام الامور ومفيش حالات طلاق ولا تفكك ولا اي دليل علي ازمه منتصف العمر
نسبه اللي مروا بازمه منتصف العمر كانت من 10- 26 % فقط ...النسبه والدراسات دي ليها تأثير ايجابي وهو لو نفسك في حاجه اعملها ..مفيش حاجه اسمها فات الاوان او العمر اتاخر اني اشتري كذا او ادرس كذا او اصيع في المكان الفلاني ومتشعرش
بالشفقه علي نفسك او توهم نفسك بازمه منتصف العمر
